Madagascar-Tribune.com

Toko tapaka

Naivo kely — 2009-01-26T03:48:39Z

Toko tapaka

Écouter cet article

Mitsingilaila ny fitondra foibe ankehitriny. Io dia noho ny hetsi-bahoaka izay miseho eto an-dRenivohitra, mba tsy hilazana fa mety hanerana an'i Madagasikara. Vokatry ny tsy fisian'ny fifampihainoana no anton'io, satria efa ela no nitaky fa misy tsindry hazo lena mitranga eto amin'ny firenena.

Nipoaka iny ny sarom-bilany. Ny tohiny no tsy hay na hiparitaka hatramin'ny aty vilany, na tsia, fa ny azo antoka, tsy ho faty intsony ny afo efa niotrika tao am-pon'ireo mahatsiaro fangirifiriana teto amintsika hatramin'izay. Tsy ho eto an-tanindrazana ihany no hanako ity tranga ity, fa hanerana an'izao tontolo izao. Nahoana tokoa moa no tsy hifantoka eto ny mason'ny mpanara-baovao rehetra, satria firenena handray ny fivoriana an-tampony aty Afrika isika, ny volana Jolay ho avy izao. Eo ihany koa ny fivorian'ny tany mampiasa ampahany na manontolo ny fiteny Frantsay.

Kely finoana anefa ny maro ny mety hanaovana ireo aty, noho izao hetsi-bahoaka eto an-dRenivohitra izao. Tsy hisy firenena andeha hanao sorona ny ainy any amin'ny tany misy hotakotaka. Ekena fa mety ho fandaminana ny sehatra toy izao no ahatongavan'ireny vahiny ireny, saingy isika firenena tsy misy manafika, fa firenena miady an-trano. Tsy vao izao no misy ady an-trano tahaka izao, fa saika ao anatin'ny valo na folo taona hatrany. Iza no andeha handany ron-doha lava amin'izany ? Tsy mety fay isika, fa toa voahozona ny hiady an-trano lava izao. Izay anie no ilaina ny fahaiza-mihaino sy mifanakalo hevitra e. Toko tapaka ny an'ny fanjakana sy ny ben'ny tanàna ary ireo mpanara-dia azy avy, ka ahiana ny hisian'ny fifandonana toy ny tamin'ny taona 2002. Dia hifandrafy lava eto, ary hifanagadra avy. Tsarovy fa raha mivadika eo ny glaoby eto Madagasikara, dia hisy valifaty mahatsiravina eto. Dia ho sanatria ve hisy hitsoam-ponenana toy izao mahazo an-dRatsiraka sy ny firongony izao eto ?

Hanorana sa hanavandra ?

Naivo kely — 2009-01-24T02:59:50Z

Lasa lavitra ny hetsiky ny ben'ny tanàna eto an-dRenivohitra sy ireo mpiara-dia aminy. Tsy fitakiana fe fitakiana tsotra intsony fa efa miroso any amin'ny fandrodanana ny fanjakana foibe mihitsy.

Tsapa io amin'ireo fivoriana ataon'izy ireo etsy sy eroa. Tsy misy mihitsy finiavana hiroso amin'ny fiaraha-midinika, fa izao fitakiam-bahoaka izao no hany heno amin'ny resaka avoakan'ny vavany. Ankilan'izay, dia tsy mbola hay izay ho valin-kafatra ho asetrin'ny fanjakana izao. Na ho ela anefa na ho haingana, dia ho ratsy ny fiafaran'izao tantara izao. Maro amintsika no mahafantatra ny tohiny, saingy minia tsy miloaka ny vava izay tohiny izay, sao ahitan-doza. Io hiarahana mahita io ny fifandonana eo amin'ny filoham-pirenena sy ny ben'ny tanàna. Tsy azo adino fa samy manana ny olona mpanara-dia azy avy ireo, ka ny ahiana, dia mety any amin'ireto vahoaka ireto no hifandramatra ny farany.

Heno mantsy fa misy fikambanana vonona hiaro ny safidiny tamin'ny fandaniana ny filoham-pirenena eto. “Nahazo ny isam-bato 53% ny filoha manerana an'i Madagasikara” , hoy izy ireo, ka tsy avela ho viravirain'ny olona te-handrombaka fahefana” . Hanorana sa hanavandra, hoy ny fomba fiteny ny tranga eto amin'ity tanàna ity ? Efa manomboka mifanondro molotra ihany koa ny eny anivon'ny fiaraha-monina. Ny ady an-trano no tena atahorana vokatry ny tsy fitoaviam-pijery politika eto amin'ny tanàna.

Hitarika vahoaka etsy amin'ny kianjan'Ambohijatovo indray ny ben'ny tanàna anio. Hisy ve ny sakana ataon'ny mpitandron'ny filaminana sa avelao ho eo fa rehefa reraka mangina eo ihany ?

Tanteraho fa azo atao !

Naivo kely — 2009-01-23T03:56:56Z

Raikitra ny fidinana ifotony ataon'ny fitondrana eny anivon'ny vahoaka. Fijerena mivantana ny asa tokony ho atao, mba ahafahan'ny rehetra miala ao anatin'ny fahasahiranana. Hifaninanan'ny andrim-panjakana sy ny olom-boatendry sy ny olom-boafidy ny toy izany.

Tsara tokoa ity fomba fiasa vaovao ity, satria raha tsy nidina ifotony ny filoha Ravalomanana, dia tsy nisy mpitsetra ny fanamboarana ny hopitaly etsy Befelatanana sy ny HJRA Ampefiloha. Hanara-penitra ny asa, ary maro ireo fitaovana tsy misy ao amin'ireto hopitaly ireto, na nisy fa efa simba no ho soloina vaovao. Toa nitondra fahasitranana ho an'ireo marary ny fandrenesana izany. Miara-miaky ny rehetra, fa tsy andoavam-bola ny fitsaboana tena amin'itony sehatra itony, saingy vidiana avokoa ny fanafody ampiasaina na ny trano hitoerana, raha hisafidy izany ilay marary. Midika io, fa raha tsy misy vola, dia fahafatesana no hita. Inona no sakana tsy ahafahan'ny fanjakana manome fanafody maimaim-poana ny marary ? Nahoana ihany koa raha averina indray ny fanomezana sakafo maraina, atoandro hariva ireto marary ireto ? Tanteraho fa azo atao izany, raha eo amin'ny mpitondra ny finiavana hanova.

Hiarahantsika mahita fa ny fahasalamana no voalohan-karena. Koa raha niroso amin'ny fanatsarana ny atiny sy ny ivelan'ny hopitaly ihany isika, aleo mba hitovy lenta amin'ny any ivelany ny eto an-toerana e ! Ho azo antoka fa hanana hery goavana ny vahoaka amin'ny asa izay ho ataony amin'ny fampandrosoana ny tanindrazana, ka raha sanatria marary, dia ho azo antoka fa ho tsara karakara. Izany no tena fiovana, satria vitan'ny tany aloha io, koa nahoana no tsy ho vita ankehitriny ?

Mitomany ny faritra

Naivo kely — 2009-01-22T03:20:04Z

Tonga ny rivo-doza, ary manomboka manimba zavatra maro amin'ny toerana izay lalovany, ka mampitondra takaitra ny vahoaka maro. Potika ny trano sy ny tetezana tany amin'ny faritry Menabe, ary toy izany ny any Sava. Manomboka misy ny tra-boina, ary mandray ny andraikiny ny eo anivon'ny BNGRC.

Miakatra ny rano, ary manomboka hita ny fahapotehan'ny voly isan-karazany. Tsy mbola misy ny aina nafoy, izay isaorana ilay nahary, fa ny biby fiompy kosa no voalaza fa nisy lasan'ny rano. Na eo aza izany, dia tsy kivy tsy ketraka ny mponina fa mitraka hatrany. Manomboka aparitaka any amin'ireo olona efa tra-boina ankehitriny ny fanampiana avy amin'ny fitondram-panjakana, toy ny sakafo sy ny fanafody. Andro maromaro mialohan'izao fahatongavan'izao rivo-doza izao no efa niomana mialoha ny sehatra iray miahy amin'ny loza voajanahary toy izao. Efa maro ny trano lay naparitaka eran'ny faritra, ho fiomanana mialohan'ny loza.

Mifantoka any amin'ity rivo-doza ity avokoa ny mason'ny rehetra. Rariny izany, satria loza mihatra amin'ny firenena. Tsy apetraka ho andraikitry ny fanjakana samy irery anefa ny fisorohana ny loza fa manana andraikitra goavana lehibe amin'io ny isam-batan'olona. Ny haino aman-jery isan-karazany. Aoka mba omena sehatra amin'ny fampahalalàna vaovao ny vahoaka, fa tsy dia ny resaka politika izay manimba hatrany no omena sehatra isan'andro. Izay ilay andraikitra fanabeazana sy fitaizana eo amin'ny fahampahalalam-baovao isan-karazany. Mitomany tanteraka ny faritra maro noho iny rivo-doza iny, izay tsy ho vita ao anatin'ny fotoana fohy ny fanarenana ny simba.

Midika izany, fa ho sasatry ny manarina hatrany isika isan-taona izao. Antenaina fa tsy hanampy trotraka ny fahasimbana ny “rivo-doza politika” izay toa miha-mahazo vahana eto amin'ny firenena. Zava-droa loha samy hafa nefa sahala ireo. Samy manimba ny toe-karena avokoa ireo, ka samia mitandrina, fa ny nitranga teo aloha aza efa nanenenana.

Mandehandeha mahita raha

Naivo kely — 2009-01-21T03:39:43Z

Manomboka ny asa etsy Befelatanana. Nisento avokoa ny rehetra, tamin'ny fanapahan-kevitra noraisin'ny fanjakana momba ny fanamboarana azy ity. Niara-niaky ny rehetra, fa tsy tao anatin'ny tetikasan'ny minisiteran'ny Fahasalamana ny hanamboatra azy io, saingy rehefa nidina tampoka teny ny filoha Ravalomanana, dia niroso tamin'ny baiko hentitra ny hanamboarana izany hopitaly manana ny lazany izany.

Tsy ao anatin'ny tetibolan'ny minisitera taona 2009 ny fisian'ny fanamboarana azy. Eny na dia miakatra andro aman'alina aza ny teti-bola natokan'ny fanjakana ho entin'ny minisitera miasa. Vola avy any amin'ny filoham-pirenena mitentina Ar 200 tapitrisa aloha hatreto no entina hanarenana ny simba. « Izay marary andrianina », hoy ny fomba fiteny Malagasy izay. Mbola mitoetra ve io ankehitriny ? Tsia no valiny, satria izay tsy manam-bola dia eo no raisina. Misy ny ezaka izay apetraka eny anivon'ireny minisitera ireny, saingy moa mba azontsika an-tsaina no mitranga any amin'ny toeram-pitsaboana lavitra andriana rehetra any ? Ny eto an-dRenivohitra aza fahapotehana no hita. Miaiky ny rehetra fa marina ilay tenin'ny filohan'ny Nosy, ny tsy tokony hijanonan'ny tompon'andraikim-panjakana ao anaty birao lava. « Ny mandehandeha mahita raha », hoy ny fomba fiteny, koa antenaina fa raha misy ny fitsidihana matetika ataon'ireo manam-pahefana isan-karazany, dia hivaha avokoa ny olana mianjady amin'ny mponina maro isaky ny faritra. Sa tsy sahy mandray andraikitra mivantana ireny olona nomena fahefana ireny, raha tsy eo ny filoha ?

Very ny hasina maha-malagasy

Naivo kely — 2009-01-20T03:37:32Z

Manimba zavatra ny politika. Tafiditra lalina amin'io anefa isika eto an-dRenivohitra, ary mifampiahiahy avokoa ny mpiara-belona rehetra. Fomban-javatra io, satria na ny mpivady aza tsy miray fandriana rehefa samy manana ny firehana arahiny ny andaniny sy ny ankilany.

Ny tena mampalahelo tao anatin'izay andro vitsivitsy izay, dia ny fahaverezan'ny soa toavina maha-malagasy sahady eo amin'ny ankolafin'olona sasany. Voaivaiva ny raiamandrenin'ny firenena, dia ny filoha Ravalomanana izany. Nahetrin'ny sasany ambany ny haja sy voninahitry ny firenena. Endrika iray, izay hilazana ny tsy fisian'ny fahamatoran'ny toe-tsaina ny toy izany. Tsarovy, fa na inona tsy fitoviam-pijery politika eto, dia mbola Ravalomanana ny filoham-pirenena, ary raiamandrenin'ny Malagasy rehetra. Tsy ho diso isika raha mametraka hatrany ny haja ho an'izany raiamandreny izany.

Toy izany koa ny mpomba ny ankilany. Izany ben'ny tanàna eto an-dRenivohitra izany, dia manana anjara lehibe hitondra ny tanàna sy ny fiainam-bahoaka ao aminy. Manana ny fomba fijery manokana izay tsy hitoviany amin'ny mpitondra izy. Tsy izay no entina hanambaniana ity ben'ny tanàna ity eo amin'ny lafiny maro. Ny hevitra no tsy mitovy, fa ny ra maha-malagasy ao amintsika rehetra. Nahoana no vingavingain'ny hafa ihany koa ity ben'ny tanàna ity ? Omeo ny haja amam-boninahiny ireo olona roa tsy mitovy fomba fijery ireo. Zaran'ny hafa aza isika hifanebaka am-pitoerana eto, ka hiafara amain'ny ady an-trano, mba ahamora ny hanjanahana antsika amin'ny lafiny maro. Dia ho sanatria ve hitovy amin'ireo tany atsy Afrika hanjakan'ny vono olona sy ny ady an-trano ny eto an-dRenivohitra, izay efa mitady ahazo vahana any amin'ny faritra samy hafa ? Miankina amintsika mianakavy ny hipetrahan'ny fampanjakana ny fifanajana, na dia ao aza ny fomba fijery samy manana ny azy. Aleo haka anjorom-bala ny tendrom-po tsy mba namana sao hanenenana atsy ho atsy.

Totohondry tsy mivonkona amin'ireny ve Fahendrena ?

RAW — 2009-01-19T02:49:18Z

An'alina ny olona tonga tetsy Ambohijatovo ny sabotsy lasa teo. Nizotra sy nirava tsy nisy romoromo ary dia afaka niteny sy naneho ampahibemaso ny fitiavany izany demokrasia izany na ny tonga teny an-kianja na ny tsy tonga teny. Satria ampahany amin'ny mponina eto Antananarivo tokoa ireny teo Ambohijatovo ireny.

Antso voalohany hono iny ary dia afa-po ny mpikarakara. Afa-po koa ny mpitandro ny filaminana satria tsy araka ny natahorana azy hoe hisy korontana. Raha tsorina dia samy nahatsapa fa tsy hisy hahazo tombontsoa amin''izay korontana eo na ny mpikarakara sy mpikatsaka fahalalahana sy fahafahana maneho hevitra sy mitaky fitoviana, na ireo izay mahita fa efa misy ireo rehetra ireo fa inona indray ity hetsika tarihin'ny Ben'ny tanàna ity ?

Ny fotoana tamin'ny sabotsy moa dia nararaotina ihany koa nanaovana antso faharoa nolaroina fitakiana hafa noho ireo efa natao teo aloha. Ary raha ny fahitana azy dia niakatra antanan-tohatra hafa ny fitakiana. Na dia tsy niafina tamin'ny olona rehetra aza ny tian-katongavana tamin'ireny dia mazava fa mitaky fanovana ny Ben'ny Tanàna. Toa mananatra sy mampitandrina ny mpitondra izy amin'ireny. Ity tokoa angaha no tonga amin'ny tenin-jatovo hoe “totohondry tsy mivonkona amin'izany efa maty hozatra” ; mba hilazana hoe efa tena fiantsiana mihitsy. Raha ny fahendrena Malagasy aloha, izay noventesina matetika tato ho ato dia toa tsy mifanandrify loatra. Efa miova tokoa ny toetrandro, efa maoderina sy “mondialisation” izao. Amin'ny mpanabe sy ny mpandinika aloha dia satry aza ny zanaka miteny sy mampahafantatra ny alahelony toa izay mamoy fo any ambadika any rehefa tsy afaka mifampiresaka intsony ny ao an-trano. Araka ny mba naverimberin'ny mpampianatra tany an-tsekoly dia ny fifampiresahana, ny fifampihainoana no tena mampirindra ny fiarahamonina, na ao an-tokantrano io na ivelany.

Hatrizay tokoa, hoy ny olobe iray, dia be loatra ny mitompo teny fantatra ka nahatonga ireny fihetsehan'Antananarivo nifanesy ireny. Ary dia notanisainy teo ny hetsika 1971-1972, 1991-1992, 2001-2002. Dia nanontany tena izy hoe dia mbola hiverina amin'ireny indray ve amin'ity fa tsy hahalala hifampihaino, hifanantona sy hiara-hitady vaha-olana maharitra ? Sao dia hananan-tsiny amin'ny tanindrazana fa toa Antananarivo foana, izay samy tian'ny an-daniny sy an-kilany raha ny fijery sy fahafantarana azy, no hipoiran'ny fanafintohinan'ny hafa ?

Asa moa fa dia tosa-kevitry ny antitra io. Raha ny demokrasia aloha dia ady isan'andro isan'andro ary tahaka izay koa ny fahalalahana. Ny marina dia tsy azo mora foana io ary tsy hisy fanjakana izany hanome an'io fotsiny amin'izao raha tsy mitaky ny olom-pirenena.

Takon'ny aloka

Naivo kely — 2009-01-17T02:27:31Z

Tia raha isika eto Madagasikara, ary tsy mety fay amin'izay tranga efa nampidi-doza ny firenena. Hifantoka etsy Ambohijatovo ny mason'ny mpanara-baovao maro. Na dia ambara aza fa leo politika ny olona, dia tsy azo hodian-tsy hita ny fifantohan'ny saina amin'izay mety ho tohin'ny tolona ataon'ny mpanohitra.

Ny mampalahelo, dia variana amin'ny resaka toy izao ny ankamaroan'ny maro, ka ny lahasa entina hanatsara ny fianam-bahoaka andavan'andro no adino. Ny mpitantana ny kaominina, dia hifantoka amin'ny fitakiana ataony manomboka izao etsy Ambohijatovo. Ny fanjakana foibe kosa, dia mety ho variana hamono ny afo arehitry ny sasany. Ny vahoaka kosa etsy ankilany very fanahy toy ny valala voatango. Ekena fa misy tompon'andraikitra isan-karazany mampandeha ny masinina adiministrativa, saingy toa takon'ny aloka ireny asa ireny, raha tsy hiteny afa-tsy ny fanamboarana ny hopitaliben'i Befelatanana, ny fijinjana ny vary aloha, sy ny fanadiovana ireo lakan-drano isan-karazany eto an-dRenivohitra. Misy ny faly amin'ity hetsika manomboka anio eny Ambohijatovo ity, ary tsy vitsy koa ny tsy faly, satria manelingelina ny fihariany.
Ny ho avin'i Madagasikara, manao ahoana ? Mianakina aminao ny valiny.

Aza maika ny hanidina

Naivo kely — 2009-01-16T03:31:20Z

Takon'ny resaka politika ny sehatra maro eto amin'ny firenena. Ary mahaliana ny maro izay maneho hevitra amin'izany. Isan'io ny nambaran'ingahy ben'ny tanàna sy ny filohan'ny Repoblika ny alarobia teo.

“Na inon-kidona na inon-kihatra, dia tsy hihemotra amin'ny jadona ny tenako” , hoy ny ben'ny tanàna Rajoelina. Niantso ny vahoaka rehetra ny tenany ny sabotsy izao mba hiara-hifanotrona etsy Ambohijatovo. Ny filoha ihany koa anefa, raha nihaona tamin'ireo ankolafin'olona maro teto an-dRenivohitra teny Iavoloha, dia nanamafy, fa vonona ny hanatsara ny renivohitra ny tenany. Nampahatsiahiviny tamin'io, fa manomboka miha-potika ireo asa natao teo aloha. “Tsy avelantsika ho potehin'olona iray ny Renivohitra, satria misy olona maika ny hanidina nefa tsy ampy elatra", hoy ihany ny filoha.

Samy mamisavisa ireo andahan-teny ireo ny mpomba ny andaniny sy ny ankilany. Raha atao indray mijery tokoa, dia zary adino hatreo ny asam-bahoaka eto an-dRenivohitra. Mifantoka tanteraka any amin'ny resaka politika mantsy ny ankamaroan'ny mpitondra eto. Hiasa no nametrahan'ny vahoaka azy ireo, fa tsy hitarika grevy. Na eo aza anefa ireo hambara ho fitakiana hiseho manomboka ny sabotsy ho avy izao, dia tokony hizotra tsara ihany ny asa atao eto. Zary sorona tsy fidiny ireo mpandoa hetra raha tanàna maloto sy potika no iainany, nefa teo aloha efa mba namiratra teo anivon'izao tontolo izao i Antananarivo, ka nahatonga antsika nahazo ireny loka eran-tany ireny. Aza maika ny hanidina, ary aoka ihany koa tsy hifampihantsy ady. Any amin'ny vahoaka izao ny baolina, ka izay mendrika amin'ny filoha sy ny ben'ny tanàna no ahazo ny fon'Antananarivo.

Tsy taitra ny maro

Naivo kely — 2009-01-15T03:31:23Z

Izay ataon-dry zareo matanjaka eo, dia zakaina avokoa e. Io no teny heno etsy sy eroa nandritra ny andro vitsy teto an-dRenivohitra. Momba ny hetsiky ny mpanohitra io. Samy naneho ny heviny avokoa na ny filohan'ny Repoblika ny talata lasa teo, ary novalian'ny ben'ny tanàna Andry Rajoelina ihany koa ny alarobia.

Tsapa fa misy ny alahelo an'ity ben'ny tanàna ao amin'ny maro, saingy toa tsy marisika ny hanao hetsika politika intsony ny olona. Ireo ve tsy ahay hifandamina eo hoy indray ny hafa, fa ny sakafo hiditra ato an-kibo aloha izao no maika. Dia ny mihaino resaka sisa no atao e. Mifamahofaho ao an-tsain'ny maro tokoa ireo hetsika politika nitranga teto Madagasikara nandritra ny taona maro. Aiza no hiafarantsika amin'izao ? Toa saika manome tsiny avokoa ny mpifanolo-bodirindrina rehetra raha nahita ny tena nandeha nihazo ny Kianjan'ny 13 mey tao anatin'ny tolona nifandimby izay. Ny pataloha rovitra tamin'izany, mbola tsy voazaitra. Ny mpiasa namono tena, toa tsy nisondrotra grady, fa ny 10% fanome hatramin'izay no mbola azo. Ireo nahay nilomano nanakaiky ny mpitondra no toa nahazo vahana, ka nijoalajoala tao anatin'ny taona vitsy ny trano be sy ny fiara.

Mandeha ny ora sy ny fotoana. Mbola andeha amin'izay hetsika hitranga eto ve ny tena ? Tsy taitra amin'izany intsony ny maro, raha mandre ny resaka anaty fiara fitateram-bahoaka sy eny an-tsena rehetra eny. Dia ho hita izay mbola sahy hanao sorona ny fiainany, satria ireo nihetsika mba nanohitra ity fitondrana ity aza ka tsy misy mpijery intsony any am-ponja e.

HIMO mira fahantrana

Naivo kely — 2009-01-14T03:44:37Z

Raikitra indray ny tetikasa HIMO. Faly ny mponina sahirana fa mba misy vola kely ho raisina ahafahana amidy sakafo. Tomefy olona manadio tatatra sy manala ny lobolobo isaky ny fokontany. Olona aman-jatony maro no miara-misalahy amin'ity asa ity.

Ny fanjakana no mandray an-tanana ny raharaha, ary hita taratra, fa misy vokany ilay asa. Inona tokoa no tsy vitan'ny fifanomezan-tanana ao anatin'ny sarotra. Ny mponina mahazo vola, ary ny tanàna madio. Tsy tokony hirehareha anefa isika amin'itony tetikasa Himo itony. Ny antony dia Himo mira fahantrana. Porofo mitohaka amin'ny isam-batan'olona izao, fa be ny mahantra tsy mana-kohanina eto. Samy mahatsapa ireto vahoaka ireto, fa rano maloto no lalaovina, nefa vola tsy mahazo vary iray kilao no mba tambin'ny asa adin'ny dimy. Misy fianakaviana maro no indray mifanome tanana ao, mba hifameno ny vola hiditra ao an-tokantrano. Dia raha tsy nisy izany ity tetikasa Himo ity, dia inona no mba ho hanin'ireto mponina ireto satria tsy misy ny asa ho atao ? Izay no ilaina ilay tetikasa goavana entina hiadiana amin'ny fahantrana, satria mitombo andro aman'alina ny vahoaka sahirana, ka diso hevitra izay milaza fa ho afaka ao anatin'ny fahantrana ny antsasaky ny vahoaka malagasy amin'ny taona 2015.

Ity no tonga amin'ilay fomba fiteny hoe “mitrongy vao homana” , ary ny hatsembohan'ny tavanao no hihinananao. Raha mampiasa ny vahoaka madinika toy izao ihany, nahoana re raha mba nampiakarina hatrany amin'ny dimy arivo isan'andro no omena azy e ? Loto sy aretina anie no lalaovin'izy ireo, ka raha vola Ar 1 500 isaky ny adin'ny dimy no omena ny vahoaka, mba ohatrinona isaky ny adin'ny iray re ny vola miditra amin'ny isam-batan'olona e ? Sa Gasy madinika no miasa, ka tsy olana ny karama omena azy ? Hay ve amin'izao vanim-potoana izao, ka mbola azo ampiasaina amin'ny vola Ar 300 isaky ny adin'ny iray ny Malagasy nefa asa mafy no asaina ataony e. Izany tokoa ny mahantra.

Lapan'ny tsanga-tanana

Naivo kely — 2009-01-13T03:11:18Z

Hikaon-doha handinika lalàna indray ireo andrim-panjakana roa eto aminstika. Ny fanitsiana ny lalàm-panorenana sy ny fandaniana ny lalàna hifehy ny antoko politika no anton'izao fivoriana tsy ara-potoana izao.

Tsy dia misy zava-baovao andrasana amin'ny mety ho fiovan-kevitra ataon'ireo olom-boafidy mpanao lalàna ireo. Ny antony, dia tsy hita taratra intsony eny anivon'ireto andrim-panjakana ireto ny ady hevitra toy ny taloha. “Tsy kianjan'ny demokrasia intsony, hoy ny mpitazana fa lapan'ny tsangan-tanana” . Tsy misy izany hery an-kavia sy am-povoany izany fa toa mpanara-drenirano avokoa izy iray trano. Eny fa na ireo ambara ho tsy miankina aza, dia toa ny tahotry ny mety ho tratry ny ankivy no masaka ao an-doha raha vao raikitra ny fivoriana. Izany ve no tena demokrasia eto Madagasikara ? Dia ho lany 100% ireo lalàna atolotra eny anivon'ireo parlemanta roa eto amintsika ireo. Ho tsarain'ny tantara anefa izy ireo aoriana kely ao. Toa tsy mba olona afaka ny hiady hevitra ireo loholona sy depiote, fa olona natao hananga-tanana no betsaka. Tsy sanatria fanamaivanana ny fivoriana ataon'ireo andrim-panjakana roa ireo izao, fa ny fahatsapana ny zava-misy no mahatonga ny lahatsoratra hisosa toy izao.

Izao tokoa angaha no vokatry ny fanasaziana ny depiote izay miseho be vava toa an-dry Voninahitsy sy Zakahely, ka anatry ny aty afara ? Velontseto ny rehetra, raha mahita ny ady hevitra any amin'ireo firenena matanjaka any ivelany amin'ny fifandanjan'ny fandaniana lalàna toy izao. Misasaka araky ny fomba fiteny ny mandany sy ny tsy manaiky. Izany no atao hoe tena demokrasia.

Mihaino vavaka ve Andriamanitra ?

Naivo kely — 2009-01-12T03:29:50Z

Tsy mijery ambony fa mijery ambany. Fomba fitenin'ny olona miantso tody io, ka ilazana fa Andriamanitra ao an-tampon'ny loha mahita ny miafina rehetra, satria mijery midina ety an-tany izy fa tsy mitraka mijery ny lanitra misy azy.
Vita indray iny ny fotoam-bavaka nambara fa hitondra am-bavaka ny firenena. Ireo hery avy any amin'ny fanoherana no nikarakara izany, na dia ny avy eo anivon'ny kaominina Antananarivo-Renivohitra aza no natao antoka fa nanomana izany. Ny fanohanana am-bavaka ny firenena no voalaza fa nahatonga ireo ankolafin-kery maro samy hafa hifanohana teny Mahamasina. “Ny fivavahana no lehibe indrindra, ary ankinina aminy ny zava-drehetra” , hoy ireo tsy te-handoto tena ao anatin'ny politika. Dia mba lasa ihany ny fisainana iny omaly iny. Nisy olona izay fata-daza eto amin'ny firenena dia ny maître Avoko izany, mba nangataka tamin'ny Malagasy rehetra ny hitondrana am-bavaka ny firenena isaky ny zoma amin'ny 8 ora alina. Roa minitra monja no mba nangatahany hitodiana amin'ilay Mpahary. Moa mba nandrenesana feo amin'izany ireto mpanao politika ireto ? Sa samy hafa ny Andriamanitra hivavahana, ka tsy nampiraika ny hafa ? Vao nihetsika anefa ingahy Andry Rajoelina, dia rakotry ny fanohanana avy amin'ny hery samy hafa ny fotoam-bavaka nataony. Toa mampitombina ny fijerin'ny maro ihany izay milaza, fa ambadika politika daholo izao hetsika rehetra izao. Fa nahoana raha hitsiana ny marina e ? Matoa mbola maro ny tsy tontosa tamin'ny vavaka izay natao teto, dia ao raha, hoy ny fomba fiteny. Ka mihaino vavaka ve Andriamanitra, sa isika zanak'olombelona no be siasia ? Aoka anefa tsy hitsara, fa mbola ho tsaraina, fa ny mahafinaritra, dia amin'ny fotoan-tsarotra toy izao, vao be no mahatsiaro miantso ny Anarany.

Mivavaha ho anay tompo o ! Amen.

Diska loaka

Naivo kely — 2009-01-10T02:41:05Z

Tsy hisy ahita tombontsoa ao anatin'ny korontana, ka aleo mifampidinika. Efa an-taonany maro no nandrenesana io feo tao ambavan'ny ankolafin'olona maro teto amin'ny firenena, saingy nipoitra hatrany ny olana isan-karazany. Midika izany fa tsy nisy ny finiavana teo amin'ny ankolafin'olona samy hafa hiroso amin'izany fifampidinihana izany.

Mitaky ny fitakiany ny mpanohitra, ary mamoaka ny vanginy amin'ny izay mety ho rombahany, raha toa ka tsy mamaly izany ny eo anivon'ny fitondrana. Ny fitondrana koa ankilany raha nanao fitsidiham-paritra ny filohan'ny Repoblika, dia mbola miantso ny fifampidinihana ihany. Iza anefa no manao be marenina manoloana ity fifampidinihana ity ? Toa efa diska loaka ny fandrenesana izany feo izany. Inona no sakana tsy hirosoana amin'io raha tena eo amin'ny andaniny sy ny ankilany ny finiavana hisoroana ny mety hitrangan'ny korontana eto. Mbola mbe fanantenana ihany anefa ny maro amin'ny hisian'izany amin'ny fo mahitsy eo amin'ny hery samy hafa eto amintsika. Io no làlan'ny fahombiazana tsara indrindra, ka mbola fotoanany izao mialohan'ny ahatapahan'ny tadin'ny mpanohitra sy ny mpitondra. Sa hiandrasana hisy ra mandriaka indray vao hiroso amin'ny fampihavanam-pirenena ?

Ataovy anatra ny lasa

Naivo kely — 2009-01-09T03:43:58Z

« Tsy izay miteny hoe tompoko, tompoko, no hiditra ny fanjakan'ny lanitra ». Tsy izay rehetra milaza fa hamaha ny olan'ny Malagasy, dia ahavita fahagagana ho antsika avokoa. Ataovy anatra ny lasa, satria ny omaly tsy miova no hita eto.
Mandindona ny korontana eto amin'ny tanàna. Tsy hay hampanginina ny fandranitana ataon'ny sasany. Hikoha-maina aza atao, maika fa misy rehoka. Ny daty 13 Janoary sisa handrasana dia tonga ny fotoana. Fotoana inona hoy ny hafa ? Ny hanetsehana vahoaka hikomy amin'izao fitondrana izao.
Mampahatsiaro ny tranga nisy hatramin'izay ny fiatombohan'ny adisanina eto amin'ny tanàna. Hialohavana fotoam-bavaka, toy ilay « krisimasim-pihavanana » nataon'ny ben'ny tanàna Ravalomanana teo Mahamasina ny volana desambra 2001. Dia ireny niarahana nahita ireny ny niafarany. Nisy fifandonana teto ny taona 2002, ka mbola nampihitsoka ny sasany any ivelany hatramin'izao. Dia inona no maha samy hafa ny tamin'izany sy ny ankehitriny ? Mbola misy vahoaka te-hamerina ireny lasa ireny ve amin'izao isika miteny izao ? Ataovy anatra ny lasa, nefa izany ve no tsy hitakiana ny hampanjakana ny rariny sy ny hitsiny eto ? Be ny singam-bola mandavo ny vositra eto, ka zary tratry ny nenina hatrany isika vahoaka. Dia hihetsika isaky ny folo taona latsaka izao ve, hoy ny mpitazana. Sa ilay grevy mateti-pihavy mihitsy no mahafinaritra, mba sitrany ahay hipitihan'ny vitana raha tonga ilay mofo mamy ?

Volana ratsy

Naivo kely — 2009-01-08T04:04:57Z

Vao manomboka ny taona, dia vaky ny fonja. Raikitra ny fifanenjehana, ary nisy ny voatifitra ka maty. Mbola nitohy ny ampitson'io ihany ny vaky fonja tany Betroka sy Ambalatavoahangy. Nipoaka ny Gaz tetsy Ambohimanarina, ary olona roa maratra mafy miady amin'ny fahafatesana, ary roa namoy ny ainy. Nisy ihany koa ny fifampitifirana tamin'ny jiolahy teny Anosizato, ary nandriaka ny ra, ary lavo ny jiolahy iray izay voalaza fa nahitana fitaovam-piadiana vita gasy teny aminy.

Andro vitsy monja taorian'ny nandraisan-tsika ny taona vaovao no niseho izao tarehin-javatra mampihoron-koditra rehetra ireo. Toa fanomezana taom-baovao ho an'ny Malagasy izy ity, hoy ilay raiben-jaza izay.

Ankoatra io, dia tsy hay ny avoakan'ny ampitso. Resaka politika indray ity, satria iza no tsy mahafantatra ilay daty napetraky ny aty anivon'ny fanoherana. Miditra an-tsehatra ny fanjakana, ary nanome baiko hentitra ho an'ireo minia hanakorontana eto. Tsy mihemotra ny mpanohitra, ary vonona hatramin'ny farany. Manomboka hiakatra sehatra ny mpitondra fivavahana, na dia mbola tsy miseho mivantana aza. Inona daholo izany rehetra izany ? Ny fiainam-bahoaka etsy ankilany, mandry tsy lavoloha. Manampy trotraka io ny fidangan'ny vidim-piainana, ka na dia samy manao izay ho afany aza ny rehatra, dia mbola ny fahantrana no sakaiza tsy mahafoy. Ratsy fiatomboka ny taona, hoy ny be heritreritra, sa ity volana ity no ratsy ? Tsy takona afenina fa misavorovoro ny sain'ny mpanara-baovao, ary matahotra amin'ny fihariana izay ataony ny isan-tokantrano. Iza no hamonjy an'iza ? Aoka anefa tsy ho kely finoana, fa ny ratsy tsy maintsy misy, ary ny tsara mbola ho avy.

Ny vola misy, fa ny…

Naivo kely — 2009-01-07T04:10:40Z

Tena lafatra. Io no azo ilazana ny fiaramanidin'ny filoha Ravalomanana, ny “Force One” vaovao. Ny vahoaka Malagasy aloha no ho teteziko amin'ity, izay vao ny firenen-kafa. Io no fandresen-dahatra nataon'ny filoha ny vahoaka, mba tsy hanome tsiny azy amin'ny fividianana ity firamanidina lafo vidy ity.
Efa miakatra tokoa ny harin-karena matoa mahavidy fitaovana toy izao isika, hoy ny olona, satria tsy tao anatin'ny fotoana fohy no nilazan'ny filoha Ravalomanana fa tsy maharaka ny diany ilay “Force One” teo aloha, ka io nosoloiny tao anatin'ny fotoana fohy io.

Sambatra izy, hoy ny mpitazana, satria raitra ilay fiaramanidina ho entiny mitety izao tontolo izao. Isika vahoaka aza ity, zara raha afaka mandeha bus, satria efa mila tsy ho takatra intsony ny ny saran-dàlana.

“Mila maharaka ny toetrandro raha te-handroso” , hoy ny filoha, “ary hanaovana asa ho an'ny tanindrazana ity fiaramanidina ity, fa tsy ho entina hitsangatsangana” . Firenena iza tokoa no afaka hifaninana amin'ny hafa raha toa ka tsy zarizary ny ampinga ho entina miatrika ny fianana an-davanandro. Tsy mba afaka ny hanana zavatra tsara tokoa ve isika, hoy ny mpandalo hafa, no andeha ahihitra lava izao ? Mendrika ny hanana fitaovana raitra toy ity Force One 737-700 ity isika, ary mba manantena ihany koa ny maro mba ho raitra tahaka izany ny vokatra azo amin'ny asa izay atao aminy. “Ny vola tokoa misy fa ny ampiasaina azy no manahirana” , hoy ny filoha taona maro lasa izay, saingy mba mba hanao ahoana ihany koa re ny mety ho fandaniana isaky ny mivoaka mitety firenena amin'izy ity e ? Sa ny vokatra azo no hifampitsarana ?

Tsy nisy fepetra

Naivo kely — 2009-01-06T03:24:34Z

Vaky ny fonja. Io no nanamarika ny tontolon'ny fonja raha iny faramparan'ny taona 2008 iny, ary dia io nitohy ny alahady lasa teo indray. Be ireo gadra afaka nandositra, ary nisy ny voasambotra sy ny maty.

Tsy hidirana lalina intsony eto ny resaka zon'olombelona, fa ny maika indrindra, dia ny tsy fandraisana andraikitra manoloana ny fonja eto Madagasikara. Tsy vao izao no nilazana fa efa antitra sy mora vakiana anie ny fonja eto amintsika, nefa toa rano nararaka an-damosin-gisa avokoa ireny rehetra ireny. Ekana fa misy ny ezaka izay atao, toy ny fampitaovana fiara vaovao hitaterana ny voafonja, saingy ny tena fototra tsy voajery. Misy ny fananganana fonja vaovao saingy ny mpamatsy vola ivelany toy ny vondrona Eropeanina no manao izany. Aiza ny andraikitry ny minisitera manokana no tsy manamafy orina ireo efa nijoro ? Nahoana no efa vaky hatrany ny fonja vao hamafisina amin'ny alàlan'ny mpitandro ny filaminana isan-tsokajiny izany fonja izany ? Manambara ny eo anivon'ny minisitera isan-tsokajiny, fa misy ambadika hafa izao fahavakisana fonja nifanesisesy izao. Raha tsapa izany nahoana no tara ny fandraisana andraikitra hiarovana ny toeran'ireo gadra eto amintsika ?
Tsy nisy fepetra mialoha ve mba nahafahana nisoroka izao fahavakisana izao, izay raisina ohatra amin'ny fanamboarana ireo trano efa hita fa nolazoin'ny andro sy ny taona.

Mafampana izao ny hetsika politika eto amintsika. Tetika iray hampisavorovoroana ny saim-bahoaka hatramin'izay ny fahavakisan'ny fonja. Mino isika fa ho mailo amin'izay ny rehetra, ka ho toy ny nofy sisa izany fahavakisan'ny fonja eto Madagasikara izany, ary dia ho voasambotra tsy ho ela avokoa ireo gadra nahavanon-doza afaka nitsoaka.

Raikitra ny ady an-trano

Naivo kely — 2008-12-31T03:56:04Z

Tsy mbola azo ny mofo mamy, dia efa raikitra ny fifanjevoana eo amin'ny mpanohitra. Samy te-ho lohany avokoa izy rehetra. Tsy takona afenina intsony io korontana ao anatin'ny samy mpanohitra io, ary tsy ho gaga isika raha toa ka samy maka ho azy hatrany izy ireo rehefa tonga ny fifidianana.

Mpanao politika fanta-daza eto amin'ny firenena no naneho ny heviny omaly, izay miara-dia ao anatin'ny mpanohitra. Andro vitsy monja izay, raha nanao fivoriana hitambara izy ireo, dia efa nailika tsy ho eo anoloana ireto karazan'olona mpitarika politika ireto. "Avelao ho an'i Andry Rajoelina no eo anoloana eo", hoy ity lehilahy iray ao anatin'ny fanoherana, ary naroso teo anoloana ihany koa ireo heverina fa mpanao politika mety ahasarika olona hono. Ilaina miseho tele ireo, ka isika aleo aty afara.

Teo no nisian'ilay fifandirana teo amin'ny samy mpanohitra. Velona ny fifampitsikerana, ka nipoitra hatramin'ny teny nambaran'ingahy Lahiniriko Jean, tamin'ny 17 desambra 2005 raha nanao hetsika teo amin'ny kianjan'ny 13 mai ny mpanohitra, ary nisy mpanao politika voadaroka sy voasambotra. Ingahy filohan'ny Antenimieram-pirenena kosa, tao an-dapa dia nilaza tamin'izay fa "tsy eny an-kianja no hanaovana ady hevitra fa ato anaty lapa no kianjan'ny demokrasia". "Ny mifanohitra amin'izay anefa no ataon'ireto namanay ireto amin'izao", hoy ity mpanao politika nanambara ny alahelony ity.

Omaly hariva, dia nivory tetsy amin'ny hotely Soimanga Manakambahiny ireto mpanohitra ireto, ary saika tsy tazana tao ireto mpanohitra mihevitra fa tafiditry ny mpitady seza ny fitakiana izay atao. Raikitra sahady ny ady an-trano nefa ny fitakiana mbola tsy nisy nivaly. Tsapa izao, fa misy andian'olona mijapy TGV ao, ary manosika ity farany hivoaka ny làlam-by tokony hizorany.

Miandry ny tohiny isika, na ho tody amin'ny gara hitodiany ny lamasinina, na hivarina any anaty hantsana.

Vanja

Naivo kely — 2008-12-30T03:30:51Z

Hivalona afaka andro vitsy ny taona. Samy mifantoka any amin'ny taona ho avy ny mason'ny olona manana aina rehetra. Izay ahadinganana ity taona 2008 ity no tanjona, satria zava-dehibe amin'ny Malagasy izany nadingana taona iray izany.

Taona hitondra inona ho an'ny vahoaka malagasy io taona hitsidika io ? Izay no mby tonga ao an-tsain'ny maro. Ny akaiky indrindra, dia ilay fepetra takian'ny mpanohitra eto amintsika momba ny hamahana ireo olana takian'izy ireo hatramin'ny 13 janoary izao. Miankina amin'ny kabarin'ny filoha Ravalomanana rahampitso hariva amin'ny 7 ora anefa ny tsy hampipoaka ny vanja any amin'ireo mpanohitra. Mpanohitra, izay tsapa fa miantehitra betsaka any amin'i Andry TGV izany lehilahy afaka maka ny fon'Antananarivo ? Manana andraikitra lehibe amin'ny mety ho tranga hiseho eto isika rehetra. Midika io fa eo ampelantanan-tsika ny fampandrosoana ny firenena, na ihany koa ny famotehana ny toe-karena. Tsy hisy firenena afaka hiadana ao anatin'ny korontana. Tsy misy olona tsy mitaky fiovana eto, nefa tsy fiovana ho any amin'ny ratsy fa hanatsara ny fiainana isan-tokan-trano. Handamina ary sa handrangitra ny mpanohitra ny lahateny ho ataon'ny filoha rahampitso ? Tsy hisy ray aman-drenin'ny firenena haniry korontana eto, saingy ny ankilany toa efa tongotra mby an-dakana, ka miandry izay hanapoahana ny vanja sisa.

Solika vita gasy

Naivo kely — 2008-12-29T03:50:08Z

Mihazakazaka ny mpandraharaha vahiny hidrandraka ny harena eto Madagsikara. Tsy asiana resabe amin'izany intsony ity mitranga ao Ambatovy sy any Tolagnaro ity. Harena tsy hita pesipesenina no ahondrana any ivelany, izay tsapa fa kely sy bitika ny mba tombontsoa tafajanona ho an'ny Malagasy.
Miditra amin'ny fitrandrahana ny solika any Tsimiroro sy Bemolanga ihany koa ny vahiny ankehitriny. Voalaza fa solika 25000 litatra isan'andro aloha hatramin'izao no efa azo ao Tsimiroro iny, fa antenaina hiakatra hatrany amin'ny 100000 litatra isan'andro atsy ho atsy. Hatrany amin'ny 100 km miala ny morontsiraka ao Mahajanga any am-povoan-dranomasina any no hitrandrahana solika eto amintsika, izay efa miditra an-tsehatra ihany koa ny TOTAL amin'izany asa izany.

Solika vita gasy io, izay antenaina fa hiparitaka eto amintsika izany, ka ahafahana hampihena ny fanafarana solika any ivelany. Hidina ihany koa ny sarany eto an-toerana, ka hidina miaraka amin'io ny vidim-pianana izay efa mampikaikaika ny maro. Ny tany mpamokatra "Pétrole" hono dia saika hanjakan'ny ady an-trano, toy ny hita any ivelany. Dia ho sanatria izay tokoa ve no hitranga eto ? Iza tokoa no mahita raha izay no mampihetsika indray ny mpanohitra hikasa hanao zavatra hafa eto amin'ny fireneny ? Dia ho hita eo izany, fa ny antenain'ny rehetra, dia mba isika tompon-tany no tena ahita vokany lehibe amin'ireo harena trandrahan'ny vahiny eto, fa tsy ho sanatria ho tompony mangatak'atiny lava izao, ka ny vahiny matavy, fa isika kosa kaozatina.

Ahodino ho vola

Naivo kely — 2008-12-27T03:46:37Z

Manankarena isika eto Madagasikara, ary be no milaza fa sarotra ho an'ny Malagasy ny hisian'izany fahasahiranana ara-tsakafo izany. Mitombina io raha ny fahitana ny fitobaky ny sakafo namidy nandritra ireny fety ireny no jerena. Ny vola indray no tsy maharaka, hoy ny fomba fiteny.

Mbola be anefa no tsy afa-po amin'ny vidim-bokatra azony, ka mitaraina lava fa tsy mahavelona ny asa fambolena. Mety ho marina izany amin'ny hafa, nefa azo atao tsara ihany koa ny mampiasa ny saina, manita-kevitra amin'ny zavatra hafa. Manangana orinasa madinika na salasalany, izay afaka manodina ireny voankazo ireny ho sakafo ambifotsy. Vola azo vetivety io, ary azo atao tsara ny manondrana izany any ivelany. Eny fa ireny anana ireny aza, dia vidian'ny vahiny lafo any ivelany any. Afaka mandranto fahaizana ao anatin'ny volana vitsy ihany koa ny tantsaha mamadika ireny vokatra ireny ho sakafo azo tehirizina. Be ireo vahiny no manafatra vokatra eto Madagasikara, raha tsara kalitao ny ilay entana. Inona no tsy hanaovantsika izany ? Raha ny tsapa dia matahotra ny ankamaroan'ny olona ny mindrana vola any amin'ny banky. Ny zana-bola alain'ny banky dia efa mety hihena, fa ny fahasahiana eo amin'ny tsirairay sisa andrasana. Ahodino ho vola ny vokatra, fa ny ankamaroan'ireo orinasa goavana eto amintsika dia niainga tamin'izany avokoa. Raha tsy nahitana tombony ny fambolena, dia mikaroha zavatra hafa ho fidira-mbola fanampiny e.

Dadabe Noely roa

Naivo kely — 2008-12-22T03:31:30Z

Ny mizara kilalao sy vato mamy no nahafantarana ny dadabe Noely hatramin'izay, dia misy kosa dadabe Noely mizara hevitra any amin'ny vahoaka ankehitriny. Dadabe Noely roa izy ireo, na dia heverina fa tsy mbola dadabe aza raha ny hatanorany no jerena.

Ny dadabe noely iray, dia maneho hevitra matetika rehefa miseho amin'ny haino aman-jery. Isaky ny alahady hariva ihany koa dia miteny izy. Ny filoham-pirenena io. Manambara ny ezaka natao sy ny tsy maintsy mbola hatao ny lehilahy. Fa nisy dadabe noely hafa ihany koa saika miteny foana tao ho ao, satria angaha voan'ny tsindry hazo lena ny orinasany, ka io no làlana nidirany ho isan'ny lohandohan'ny mpisorona ao amin'ny antoko mpanohitra. Na dia maniry toy ny bozaka aza ny fanehoan-kevitra politika isan-karazany, dia ny azy mirahalahy mianaka ireo no tena hifantohan'ny sain'ny maro. Omaly dia samy nanakoako tamin'ny haino aman-jery indray ny feon'izy mirahalahy ireto. Ny an'i Andry Rajoelina tamin'ny onjam-peo tsy miankina ny atoandro, ary ny an'ny filoham-pirenena kosa tao amin'ny haino aman-jerim-panjakana, izay misy ny "tenin'ny filoha" isaky ny alahady. Hevitra samy manana ny azy ireo, saingy ny vahoaka kosa no mandray izay tandrify azy. Na dia tsapan'ny maro aza fa misy afo miotrika eo amin'ny raharaham-pirenena ka miandry ny rivotra hitsoaka hampirehitra azy, dia ny fety aloha izao no masaka ao amin'ny fiainan'ny vahoaka. Ny antony, dia tsy hisy ampiditra iray kapoaka any anaty vilaniny ny fifandirana tsy misy farany. Asa aloha fa ny efa vita aza toa be ny nanenina, koa iza indray no mbola ho voasariky ny adilahy politika tsy misy farany eto ? Dia miankina amin'ireo dadabe noely roa ireo ve no ho avy politika eto ? Asa fa mirary fety sambatra e !

Fisamborana ?

Naivo kely — 2008-12-20T03:34:27Z

Resabe teto an-dRenivohitra omaly ny feo niely tetsy sy teroa fa hosamborina hono ingahy Andry Rajoelina. Iza no hisambotra azy, ary inona no antony ? Io no feo niraradraraka tetsy sy teroa omaly tontolo ny andro. Mialoha ny nahafantarana ny marina avy amin'ny Fanjakana dia efa niainga sahady ny tora-po teny rehetra teny, ka zary tsy voafehy ny tendrom-po tsy mba namana. Hikohamaina aza atao, maika fa hisy rehoka, hoy ny fomba fiteny izay. Tsapa tamin'io omaly maraina io, fa misy mihitsy ny andian'olona maniry mafy ny hisian'ny korontana eto amin'ny firenena. Iny resaka iny no làlana iray entina hanetsehana ny vahoaka teto Iarivo, nefa soa fa mahay mandinika ny vahoaka ka samy namakafaka ny tena marina vao mandray fepetra.

Toe-javatra mampalahelo hatrany no indro fa miseho eto amintsika, vokatry ny tsy fahaiza-mandinika eo amin'ny ankolafin-kery samy hafa. Iza no tsy mahatsapa ny vokatry ny fihetsika tsy voahevitra teto amin'ny firenena hatramin'izay. Ny taona 1972, dia io mbola tsy voaharina hatramin'izao io ny fahapotehana vokatry ny korontana tamin'izany. Teo ihany koa ny hambara ho tolona tamin'ny 1991 ireny, izay nahapotika ny toe-karena Malagasy. Ny raharaha 2002 izay vao niarahana nahita ny vokany. Dia izao indray no mbola misy maniry ny hiverenan'ireny rehetra ireny. Be ireo very seza vokatry ny korontana hatramin'izay, ka zary tsy mahita ny ho harapaka intsony ankehitriny. Atao avokoa izay hetsika mifanohitra amin'ny demokrasia rehetra eto, sao mba tafaverina amin'ilay toerana be voninahitra. Dia ireny hita omaly ireny ny feo ninia nahely tetsy sy teroa, mba hanairana ny hambom-pon'ny mpifidy eto an-dRenivohitra. Mino isika fa samy ahay hitandrina ny soatoavina Malagasy isika rehetra, ka ny filaminana no ahazo vahana eo amin'ny fiainam-bahoaka eto amin'ny tanàna.

Mahamenatra

Naivo kely — 2008-12-19T03:41:49Z

Te-hiaka-dapa sa maniry ny mba ahazo famatsiam-bola ho an'ny antoko politika ? Tsapa io nandritra ilay fihaonana natao teny Iavoloha farany teo nandinihana ny sata hifehy ny antoko politika eto Madagasikara. Nipoitra tany amin'ny toerana niafenany avokoa mantsy ireo anarana antoko politika maro samy hafa. Eny misy ny mbola tsy re mihitsy hatramin'izay, ary tao ihany koa anefa ireo efa noheverina fa maty, saingy nitsangana ankehitriny fa hisy dinika hiarahana amin'ny filoha Ravalomanana.

Mahamenatra, satria misy tsy tahotra tsy henatra ny misandoka anaran-antoko tany aloha tany, nefa tsy tao amin'io fivoriana io ny tena mpikambana. Endrika iray mandoto ny rivotra politika eto amintsika ny tahaka izao. Niraraka izany ilay volabe Ar 400 tapitrisa avy any amin'ny filoha, izay volam-panjakana nambara fa atolotra azy ireo. Faly ny maro, satria mba ahazo ny anjarany ireo milaza ho antoko politika sasany.

Hitaiza sy hanabe vahoaka, ary hametraka ny tetikasany eo amin'ny fianam-pirenena ny antoko. Ny tsapa anefa, dia vitsy tamin'ireo antoko nandray anjara no mba nahavita nanao izany. Tsy ho gaga isika raha toy izao ny sehatra misy an'i Madagasikara raha ity lafiny iray ity no asian-teny. Mpivady sy ny zanany no manangana antoko, dia efa misalotra ho antoko politika ry zareo. Misedra fifidianana aza tsy sahin'ny hafa atao. Ny foto-kevitra hijoroany tsy mazava, fa ilay anarana no zary entina hitadiavam-bola etsy sy eroa. Tsy ho gaga isika raha maro ny mpikaramanady politika eto Madagaikara. Sa izay tokoa no atony hametrahana iny lalàna hifehy ny antoko politika iny ?