Misandoka ho mpandraharaha

Hasina R. — 2008-12-10T04:59:47Z

Tsy kely lalana ny ratsy. Mahita hevitra hatrany ny sokajin'olona sasany entina hamitahana ny mpiara-monina aminy mba hahazoam-bola. Tsy misoratra eny amin'ny endrika tokoa ny maha olon-dratsy. Tovolahy iray, 25 taona, no malaza amin'ny fisolokiana amin'iny faritra atsimon'ny nosy iny.

Halatra avo lenta no ataon'i Aina (io no anarana entiny). Tovolahy fotsy fihodirana, kelikely ary mahay mandresy lahatra amin'ny famitahana olona. Ao an-tanànan'i Toliara ao izy no manao ny asa ratsiny amin'izao fotoana izao, ary efa maro ny olona tratrany. Mpamily fiara karetsaka ao Toliara no tratrany farany, ary efa nametraka fitarainana any amin'ny mpitandro ny filaminana. Nilaza izy fa avy any Antananarivo ary hamoaka entana ao amin'ny fadin-tseranana no anton-diany ao Toliara. Nofainy nandritra ny alina ilay taxi, ary mbola “nampireveny” toaka niaraka amin'ny sakafo be ilay mpamily. Zoma mahafinaritra rahateo ny andro. Nifankahazo ny resaka, ary tsy nanana ahiahy na dia kely tamin'ilay tovolahy aza ilay mpitondra taxi. Niangavy izy ny hampiantranoan'ilay mpitondra taxi azy satria tsy mbola nivoaka ny entany ao amin'ny fadin-tseranana, ary lany ny vola teo am-pelantanany. Nitonona ho mpanao bizina mantsy i Aina, ka nampanantena zavatra maro ilay mpamily fiara karetsaka. Andro maromaro no niantranoany tao aminy, niantohana sakafo, nosasan-damba, ary afaka nampiasa tamin'ny fotoana rehetra ilay taxi. Tao anatin'ny tampoka anefa no nanjavonan'ilay mpisoloky, rehefa azony ireo vola nindraminy tamin'ireo mpampiantrano azy.

Nanjavona hatramin'izao

Sodokan'ny fandresen-dahatra izy mivady mpampiantrano ka nahavatra naka vola tao amin'ny mpifanila vodirindrina aminy omena an'ingahy mpanao bizina. Nilokaloka io tovolahy io fa haveriny avokoa ny vola raha vao mivoaka ny entana, ary hiara-hiasa akaiky hanao bizina hahazoam-bola. Nilaza fa mpanafatra entana avy any an-dafy io tovolahy io, ary vonona ny hampivoatra ny fiainan'izy 2 kely nampiantrano. Lasa izay ny herinandro. Antsoina amin'ny finday ilay tovolahy, tsy azo. Narahana hatrany an-drenivohitra, tany amin'ireo olona nolazainy fa fianakaviany, fa tsy nahitam-bokany. Ontsa, sady onena izy mivady kely nampiantrano ity “olon-tsy fantatra” , nitondra io fitarainana io. Sady nidiran-trosa no very fananana izy mivady kely.

Miala any ny rivotry ny fanadiovana

Hasina R. — 2008-12-09T03:36:50Z

Tokony hampiditra fonksionera vaovao ny fanjakana. Vinavinaina ho ny antsasaky ny foksionera amin'izao fotoana izao no hisotro ronono afaka 4 taona. Efa hanomboka ny fanadihadiana hataon'ny minisiteran'ny Asam-panjakana mba hahafahana mandanjalanja ny isan'ny fonksionera.

Antony maro no mampihisatra ny fanaovan-draharaha any amin'ny biraom-panjakana, fa ny lehibe indrindra amin'ireo dia ny havesatry ny dingana tsy maintsy lalovana amin'ny fikarakarana taratasy sy ny kalitaon'ny fomba fiasa. Efa miezaka ihany ny fitondram-panjakana mametraka ny fomba fitantanana mahomby, izany hoe haingana sy tsy mitarazoka. Efa misy ahitam-bokatra ireo departemanta sasany. Misy minisitera manome vahana kokoa ny fandraisana ireo tanora avy amin'ireo oniversitem-panjakana na tsy miankina, saingy mbola vitsy izany. Nahazo vahana tamin'ny fitondram-panjakana teo aloha ny kitranoan-trano. Azo antoka fa hahazo asa ny fianakaviana sy ny sakaiza. Tamin'izany fotoana izany dia ampidirina aloha ny mpiasa, fa manaraka ho azy ny asa hampanaovina azy, na tsy misy indraindray. Fanamby napetraky ny minisitry ny Asam-panjakana amin'izao fotoana ny hamehezana ny isan'ny mpiasam-panjakana. Mbola misy tavela ny “mpiasa matoatoa” ka tsy maintsy esorina.

Miomàna izay tsy ara-dalàna !

Nanomboka omaly alatsinainy 8 desambra, hifanarana ny 23 desambra, ny fanadihadiana ato anivon'ny faritra Analamanga. Hisaina ireo foksionera, ka izay tsy izy miala. Santatra ny ao amin'ny faritra Analamanga fa mbola ho avy ny anjaran'ny faritra hafa. Solosaina no ampiasain'ny minisitera amin'ny fanisana fonksionera. “Logiciel” manokana, hanadiovana ny tontolon'ny asam-panjakana. Samy hameno taratasy hamaritra ny momba azy avokoa ireo mpiasam-panjakana, ka hiharihary eo ireo mpiasam-panjakana mandray karama nefa tsy manana asa.

Madagascar-Tribune.com

Misandoka ho mpandraharaha

Miala any ny rivotry ny fanadiovana